أجنحة الأمـــــل

تجهز و انطلق و أثبت وجودك وأهجر الخذلان
تخلَّص من حواجز ضعفك الكاذب ودمرها

على نار الطموح اشرب من دلال الأمل فنجان
ومن هيل التحدي .. قِمْ.. ( بعود ) العزم بَهِّرها

أبيك تفصّل بنفسك ثياب الصبر والإيمان
وحاذر من (مقص الياس) حاذر لا يقَصّرها

أنا ما أبيك تحبس نفسك بنفسك ورى الجدران
و باسم (إنك معاق) تحطِّم أحلامك و تهجرها

إذا عجزك (عمى) كوّن من أسماعك صور وألوان
ترى نور البصيرة ظلمة الدنيا ينوّرها

و إذا عجزك(شلل) فالروح ما تنشل عند إنسان
تَحَرَّك.. سافر بفكرك و لفّ الأرض و اعبرها

وإذا عجزك (بَكَم) خَطّك لسانك... والعيون أحيان
هي أبلغ حرف يحكي عن أحاسيسك وينشرها

وإذا عجزك (صمم)سمعك كتابك... والفؤاد أحيان
يسَمّعك الحقيقة قبل ما غيرك يصوّرها

ألا يا صاحبي دام إن لك عقلٍ و لك وجدان
معك نعمه حرام بعالم الإحباط تقبرها

وإذا بك نقص صدِّق ،صاحبي ممكن ترى ما يبان
إذا تبرز مواهب نفسك الحرة وتِظْهرها

تأمل نفسك وحاول تعدّل كفة الميزان
و دَوّر داخلك عن موهبه تقدر تفجّرها

تخلي الناس عن نقصك و عجزك صاحبي عميان
و بِك ما يذكرون إلا فعالٍ طاب مَخْبَرْها

ولا تَبْني بخيالك سجن فيه المجتمع سَجَّان
و تجلس خلف قضبانه دموع الضعف تنثرها

و لا تحزن إذا ما انفض عنك الأهل و الخِلان
ما دام الله معك عينك بشوف السعد بَشّرها

أنا ما أبيك يوم تقول أنا عاجز و لا لي شان
و لا أبغيك تزجر ذاتك بعجزك و تأسرها

أبيك أقوى و أصلب من جنود الضعف و الشيطان
تِقَوِّي نفسك بنفسك و على عجزك تِصبّرها

تحرّر من قيودك ما نبي (لخيل الطموح) عنان
و زيّن صفحة التاريخ بأمجادك و سطّرها

و عمِّر لك سفينه و أنت لهْ يا صاحبي ربان
و بسم الله تشق أمواج حزنك به و تَكْسِرها

أبد ما هو معاق اللي تحدى العجز مهماً كان
إذا بالله تحدى عوقته لابد يقهرها

أبد ما هو معاق اللي يحاول يفتح البيبان
و يكْسر قيد عجزه لاجل ما روحه يحرِّرها

تأكد إن لا الوحده و لا الغربة و لا الخذلان
تِعَكِّر صفو روحٍ دوم ذكر الله يعطّرها

ما دام اليأس ما يعرف لقلبك صاحبي عنوان
( حدود الصعب) بالله ثم بالتصميم تعبرها